ගෙත්තම් කල සිත්තම්වල හැටි

කතෘ: සෝමසිරි වික්‍රමසිංහ
ප්‍රකාශක: කතෘ ප්‍රකාශනයකි

මොණරුන්ගෙන් ඇති කරදර නිසා තම කුඹුර කිරීම ඇත්හැර දැමූ ගාල්ල කිට්ටුව මගේ හිතවතෙක් පහත සඳහන් කතාව මට කීවේය.

මොණරා නිදියන්නේ උස ගස් මුදුන් වල.  හැබැයි ඌට ගසේ කොලයක් බිම වැටෙන සද්දෙට වුනත් ඇහැරෙනවා.  උණහපුළුවා හෙමින් හෙමින් මේ ගහට නගිනවා. උගේ අතින් ගහේ පොත්තක්වත් ගැලවුනොත් ඌ ඒ පොත්ත රැගෙන හිමින් හිමින් බැහැල පොත්ත බිම තියලයි නැවත නගින්නේ.  මෙහෙම නිශ්සබ්දව නැගපු උණහපුළුවා මොණරාගේ බෙල්ලෙන් අල්ල ගන්නවා.  එවිට මොණරා පියාඹන්න පටන් ගන්නවා.  නමුත් උණහපුළුවා අතහරින්නේ නැහැ මොණරා මැරිලා වැටෙන කම්.

මේ කතාවම වේයන්ගොඩ පැත්තෙ හිතවතෙකුත් මට කියලා තියෙනවා.

මට මේ පොතේ කතෘ හම්බ වුනේ පුත්තලම් තානායමට දවල් කෑම ගන්න ගිය වේලාවක.  ඔහු මා හා හොඳින් කතා කල නිසා ඔහුගේ අත්සන සහිත මෙම පොත මිලදී ගත්තා.

මෙන්න මේ පොතෙත් උණහපුළුවා මොණරා මරන කතාව තියපි!

ලංකාවේ පැති තුනකින් (ගාල්ලෙන්, වේයන්ගොඩින්, හා පුත්තලමෙන්) එකම කතාව අහන්නට ලැබුණු නිසා මේ කතාවේ ඇත්තක් ඇතැයි දැන් මට යන්තම් හිතෙනවා.  එහෙම නම් ලංකාවේ මොණරු වසංගතයක් බවට පත්වෙනකං උණහපුළුවෝ කොහෙද හිටියේ?  එහෙම නැත්නං උණහපුළුවා වඳවීමේ තර්ජනයට ලක්ව ඇති සතෙක් ද?

මොණර වසංගතයට මගේ විසඳුම තමයි මිනිසුන් මොණර මස් කන්න පටන් ගැණීම.  

මම මේ මොණර වසංගතය යන මාතෘකාව කන බොන වේලාවල් වල මතු වුනාම අශෝක රජතුමාත් මොණර මස් කාපු බව හැමෝටම මතක් කරනවා.  නමුත් "බොහොමයක් අය" (ඒ කියන්නේ කන බොන හැමෝම) මගේ ඒ කතාව පිලිගන්නේ නැහැ.  ඔවුන් හිතන්නේ මාත් ඔය “ෆේස් බුක් කතාවක්” කියනවා කියලා.  මමත් ඔය කතාව එතනින්ම හලලා දානවා මිසක් වැඩි විස්තර කරන්න යන්නේ නැහැ,මන්ද, කන බොන වේලාවේ තිබෙන සතුටට එය බාදාවක් වෙයි කියලා.  මේ අවස්ථාවේදී මම මගේ කියමනට සාධක ඉදිරිපත් කරන්නම්.

Ashoka Rock Edict 1 ලෙස හැඳින්වෙන ශිලා ලිපිය ඉන්දියාවේ Girnar, Khalsi, Shahbazgahi, Mansehra, Yerragudi, Duauli, සහ Jaugada  යන තැන් වලින් දැනට හමුවෙලා තිබෙනවා.  ඉතා සුළු වෙනස්කම් කිහිපයක් හැරෙන්නට ඒ සෑම තැනකම ඇති සෙල්ලිපියේ ඇත්තේ පහත සඳහන් පණිවිඩයයි.

Beloved of the gods, King Piyadassi, has caused this Dharma edict to be written.

Here in my domain no living beings are to be slaughtered or offered in sacrifice.  Nor should festivals be held, for Beloved of the gods, King Piyadassi, sees much to object in such festivals, although there are some festivals that Beloved of the gods, King Piyadassi, does approve of.

Formally, in the kitchen of Beloved of the gods, King Piyadassi, hundreds of thousands of animals were killed every day to make curry.  But now with the writing of this dharma edict only three creatures, two peacocks and a deer, are killed, and the deer not always.  And in time, not even these creatures will be killed.

(අසෝක රජතුමාගේ ධර්ම ලිපි ගැන දැනගන්නට කැමති යමෙකුට කියවන්න හොඳම පොතක් තමයි ආනන්ද ගුරුගේ මහතා ලියූ Asoka The Righteous, A Definitive Biography නම් පොත.  මෙය ගොඩගේ එකේ තිබෙනවා.)

ගෙත්තම් කල සිත්තම්වල හැටි පොතේ කතාව ටී. බී ඉලංගරත්න මහතාගේ පොත් වල ඇති කතාවලට සමානයි.  ඒත් කතුවරයා ඉහත සඳහන් ජන කතාව වගේ ජන කතා පොතේ කතාව තුලට ඔබ්බවා ඇති නිසා මට කියවීමේදී වැඩි සතුටක් දැනුනා.  

ඔබත් පුත්තලම පැත්තෙන් ගමනක් යනවා නම් පුත්තලම තානායමේ කෑමට නැවතිලා කතෘටත් කතා කරලා යන්න.  කෑමත් රසයි.