The Wolf and the Watchman

කතෘ: Niklas Matt Och Dag

ස්වීඩිශ් භාෂාවෙන් ඉංග්‍රීසියට පරිවර්තනය කලේ: Ebba Segerberg

ප්‍රකාශක: Atria Books 2019

මෙම කතාව දිග හැරෙන්නේ 1793 වර්ෂයේ ස්වීඩනයේ ස්ටොක්හොල්ම් (Stockholm) නගරයේ දීය.  (ස්වීඩිශ් භාෂාවෙන් ලියූ මුල් පොතේ නම 1793 ය.)  මෙම කතාව ගැන කිසිවක් හෙලි කිරීමට නොකමැත්තෙමි.  ඒ මන්ද යත් මෙය ඔබ කියයුතුම නවකතාවක් හෙයිනි.  පොත කියැවීමට පෙර වෙන තැන්වල ඇති Book reviews (such as Good Reads, Amazon) නොකියවන මෙන්ද ආයාචනා කරමි.  හැබැයි ඉක්මනින් හිත සසල වන්නෙකු නම් මෙම පොත කියැවීමෙන් වලකින්න. මෙය dark mystery ගනයට අයිති නවකතාවකි.

මෙම සටහන කුඩා බැවින් කතාවේ පසුබිම ගැන පමණක් සුළුවෙන් එකතු කොට සටහන දික් කරමි.

රුසියාව සමග සටන් වැලකට සහභාගී වූ ස්වීඩනය සටනෙන් පැරද සිටී.  ප්‍රංශයේ රාජ්‍ය පාලනයට එරෙහිව ප්‍රංශ සාමාන්‍ය වැසියන් විප්ලවයකට සැරසෙයි.  ස්ටොක් හෝම් හී සාමාන්‍ය වැසියන් ගත කරන්නේ ඉතා දුක්ඛිත දිවියකි.  ආගමේ නීති වලින් ඔවුහු තැලී පොඩි වී ජීවත් වෙති.  මරණ දන්ඩනයට නියම වූවෙකුගේ අවසාන බීම කල භාජනයෙන් බීම සුභ දායක යැයි විස්වාසයක් පවතී.  ඊට අමතරව මිය යන තැනැත්තාගේ ඇඟිලි වාසනාව ගෙන එන්නේ යැයි අදහන බැවින් මරණයට නියම වූ අයගේ ඇඟිලි කපා රැස්වූ ජනයා වෙත විසිකල විට ඒවා තමන් සතු කර ගැනීම සඳහා පොරයක් ඇති වේ.  වධකයා ඉතාම තදින් මත්පැන් පානය කර ඇති බැවින් මන්න පහර පහ හයක් ම දෙන තුරු හිස් ගෙලෙන් වෙන් නොවේ.  නගර මධ්‍යයේ ඇති විලට නගරයේ ඇති මලමූත්‍රා, කසල, රසායන ද්‍රව්‍ය එකතු වේ. එයින් එන දුගන්ධය නගර වැසියන්ට හුරුය.

පොත කියවන්න.  ඉතාම ඉහලින් වර්ණනා කරමි.  අර කව්ද කිව්වාක් මෙන් "බුද්දම්මෝ එහෙම පොතක්".